Gschäftsüsflug inu Heimatkanton va där Nicole Imboden

Där Gschäftsüsflug hed nisch hiir inz Wallis gfiärt. dReis mit dum Zug isch, NEAT sei Dank, nur zwei Stunde gigangu. Wer jetz meint, dass wär di zwei Stund einfach nur "abghockut" hei, isch komplett lätz. Iischi igiboru Reiseleitäri Nicole het nisch scho ufum Hiwäg mit Hüüswurst, Ches, Brot und Wii värsorgt. Ungefär so is de eu witär gigangu. Di kulinarischu Highlights sind gsi: Fondue (3 Sorte), Trochufleisch und Ches, Wild (inkl. iheimischum Gämschi) und zum Schluss äs richtigs Raclette. An Gitränki heiwär probiert: Johann, Riesling-Sylvaner, mehräri Heida und Rotwii usär Chälläri St.Jodern in Vispärtärbinu (www.jodernkellerei.ch). Abär eu z Kulturella isch nid z churz cho: Stockalpärschloss, z Grab vam Rainer Maria Rilke und än Wandrig entlang de Suone.